ჰელსინკის კომისიის მოლოდინში – ხელისუფლება დეზინფორმაციაზე საუბრობს, ოპოზიცია კრიტიკულ მოსმენას პროგნოზირებს

ჰელსინკის კომისიის მორიგ სხდომას თბილისში განსხვავებული მოლოდინით ხვდებიან. მმართველი გუნდი ვარაუდობს, რომ საქართველოს შესახებ „დეზინფორმაცია“ გავრცელდება, ოპოზიცია კი დარწმუნებულია, რომ მოსმენა ქვეყნის დემოკრატიულ პრობლემებზე იქნება კონცენტრირებული.
პარლამენტის ევროპასთან ინტეგრაციის კომიტეტის თავმჯდომარე ლევან მახაშვილის განცხადებით, ჰელსინკის კომისიის საქმიანობა ქართულ საზოგადოებას კარგად ახსოვს და წარსული გამოცდილება დღევანდელ მოლოდინსაც განსაზღვრავს.
მისი თქმით, „ჰელსინკის კომისიას ჩვენი საზოგადოება კარგად იცნობს, ჩვენ მათი წარსულში გაკეთებული განცხადებები ნანახი გვაქვს და დღესაც ზუსტად იგივე მოლოდინი გვაქვს“.
მახაშვილი ვარაუდობს, რომ კომისიის დღევანდელ შეკრებაზე საქართველოსთან დაკავშირებით კვლავ „დეზინფორმაცია და ტყუილები“ გაჟღერდება. ის მიიჩნევს, რომ ღონისძიება დროში დაემთხვა იმ ეტაპს, როცა, მისი შეფასებით, ორმხრივი ურთიერთობების „გადატვირთვის პროცესში პოზიტიური დინამიკა“ გამოიკვეთა.
„რეალურად, ამ კომისიის, ამ ინსტრუმენტის მიზანი ორმხრივი ურთიერთობების წახალისება, ხელშეწყობა და გაძლიერება არც არასდროს ყოფილა, ყოველთვის პირიქით იყო ხოლმე, რომ ურთიერთობები გაეფუჭებინათ… სწორედ ამ მომენტს დაამთხვიეს, რომ ამ პროცესს მაქსიმალურად ხელი შეუშალონ“, – განაცხადა მახაშვილმა.
მისივე შეფასებით, ჰელსინკის კომისია „პოლიტიკური ინსტრუმენტია“, რომელიც ორმხრივი ურთიერთობების დასაზიანებლად გამოიყენება და „საქართველოს ხელისუფლებისთვის არასდროს წარმოადგენდა ამერიკის პოზიციას“.
საპირისპირო პოზიცია აქვს ოპოზიციას. „ლელოს“ წევრ გრიგოლ გეგელიას განცხადებით, მოსმენა კრიტიკული იქნება და შეეხება ქვეყნის წინაშე არსებულ დემოკრატიულ გამოწვევებს.
„დარწმუნებული ვარ, ჰელსინკის კომისიაში, მოსმენაზე გაჟღერებული იქნება ყველა ის ძირითადი გამოწვევა, რაც გააჩნია ჩვენს დემოკრატიას და ჩვენს სახელმწიფოებრივ პროცესს“, – აღნიშნა გეგელიამ.
მისი თქმით, „ჰელსინკის კომისიის მოსმენა იქნება ძალიან კრიტიკული“. გეგელია ასევე აცხადებს, რომ „არანაირი დალაგება და ნორმალიზება არ მოხდება ამჟამინდელი პოლიტიკური კურსის შენარჩუნების პირობებში“.
შეიძლება ითქვას, ჰელსინკის კომისიის სხდომა ქართულ პოლიტიკურ სივრცეში კიდევ ერთ დაპირისპირების წერტილად ყალიბდება, სადაც ხელისუფლება და ოპოზიცია განსხვავებულ რეალობასა და მოლოდინებზე საუბრობენ.