პროგრამების რაოდენობა და ბიუჯეტი მომატებულია 

შუახევის მუნიციპალიტეტის მერია ყოველ წელს ზრდის მერიის ჯანმრთელობისა და სოციალური დაცვის პროგრამების დაფინანსებასა და რაოდენობას. როგორც მუნიციპალიტეტის მერმა ომარ ტაკიძემ გვითხრა: წელს პროგრამების ბიუჯეტი განისაზღვრა 2 740 700 ლარით, განხორციელდება 25 მიზნობრივი პროგრამა, მათ შორის 7 ახალია.

ესენია: ოპერაციებისა და სტაციონარული მომსახურების თანადაფინანსების პროგრამა; მოვლის საჭიროების მქონე შშმ პირებისა (ეტლით მოსარგებლე) და ხანგრძლივ მკურნალობას დაქვემდებარებული (საწოლს მიჯაჭვული) ბენეფიციარებისათვის კვარტალური ფინანსური დახმარება; ცერებრალური დამბლით დაავადებულ ბავშვთა აბილიტაცია-რეაბილიტაციის კურსებზე მგზავრობის ხელშეწყობის მიზნობრივი პროგრამა; თემზე დაფუძნებული მობილური გუნდის მომსახურების მიზნობრივი პროგრამა ფსიქიკური აშლილობის მქონე პირთათვის; მოწყვლადი სოციალური ჯგუფების მედიკამენტებით უზრუნველყოფის პროგრამა; სოციალურად დაუცველი ფენისათვის ყოველდღიური ერთჯერადი უფასო კვების უზრუნველყოფის პროგრამა; ავარიული სახლების მქონე და სტიქიური მოვლენების შედეგად დაზარალებული მოსახლეობის ქირით უზრუნველყოფის პროგრამა; ამბულატორიული და სტაციონარული მკურნალობისათვის საჭირო მედიკამენტებით უზრუნველყოფის პროგრამა; მუნიციპალიტეტის ტერიტორიაზე მცხოვრები 4 და მეტი 18 წლამდე ასაკის მრავალშვილიან ოჯახებზე ერთჯერადი მატერიალური დახმარების პროგრამა; გაჭირვებულ ოჯახებზე გარდაცვლილ პირთა დასაფლავებისთვის გასაცემი ერთჯერადი მატერიალური დახმარების პროგრამა; უკიდურესად გაჭირვებული, ძველი საცხოვრებელი სახლების მქონე და უსახლკარო ოჯახებზე ერთჯერადი ფინანსური დახმარების მიზნობრივი პროგრამა; კრიზისულ მდგომარეობაში მყოფი ბავშვიანი ოჯახების  დახმარების პროგრამა; ვეტერანთა ერჯერადი მატერიალური დახმარების  პროგრამა ვეტერანთა დღესთან დაკავშირებით; სპეციფიკური სამკურნალო კვების პროდუქტების შეძენისათვის ფინანსური დახმარების მიზნობრივი პროგრამა; დიალიზის პროგრამაში ჩართული შუახევის მუნიციპალიტეტის ტერიტორიაზე მცხოვრები მოქალაქეების ტრანსპორტირების მიზნობრივი პროგრამა; სიღარიბის ზღვარს  ქვემოთ მყოფი ოჯახებისათვის საცხოვრებელი სახლის სახურავების შეძენა; სოციალურად დაუცველი (ღატაკი) ოჯახების დახმარების პროგრამა; მარტოხელა მშობლის სტატუსის მქონე პირებისათვის დახმარების მიზნობრივი პროგრამა.

ახალი პროგრამებია: პერსონალური ასისტენტის მომსახურების პროგრამა; პაციენტის განსაკუთრებული სამედიცინო საჭიროებებით უზრუნველყოფის პროგრამა; უსინათლოთა საჭირო ინვენტარით უზრუნველყოფის პროგრამა; 18 წლამდე შშმ ბავშვთა კლიმატოთერაპიის საკურორტო-სარეაბილიტაციო პროგრამა; შუახევის მუნიციპალიტეტის ტერიტორიაზე მცხოვრებ ოჯახში ახალდაბადებული ბავშვის მატერიალური დახმარების პროგრამა; ონკოლოგიურ და ხანგრძლივ მკურნალობას დაქვემდებარებული დაავადებების და ტრავმული დაზიანებების მქონე სოციალურად შეჭირვებულ პირთა ოჯახზე ერთჯერადი ფინანსური დახმარების პროგრამა; მრავალშვილიანი ოჯახების წევრი სტუდენტების ეკონომიკური მხარდაჭერის პროგრამა. ახალი პროგრამების ნაწილი საკრებულოს წევრების მიერაა ინიცირებული. პერიოდულად და მიზნობრივად მიმდინარეობს პროგრამების ბიუჯეტის ათვისება.

ოთარ ცინარიძე