სარხაიანის სახელობის ტურნირზე
მუხრან ვახტანგაძის სახელობის ბათუმის სპორტის სასახლეში დასრულდა სპორტის საერთაშორისო კლასის ოსტატის, მსოფლიოსა და ევროპის ჩემპიონ სარქის სარხაიანის ხსოვნისადმი მიძღვნილი ტრადიციული საერთაშორისო ტურნირი მაგიდის ჩოგბურთში, რომელიც მე-17 წელია იმართება.
შეჯიბრება კადეტთა და უფროსი ასაკის სპორტსმენთა შორის ჩატარდა. მასში საქართველოს წარმომადგენლებთან ერთად, ბულგარეთის, თურქეთის (ორი გუნდი) და სომხეთის (ორი ნაკრები) ჩოგბურთელები მონაწილეობდნენ. სულ ჩემპიონობისთვის 70-მდე სპორტსმენი იბრძოდა. ასპარეზობა ვაჟთა და გოგონათა შორის, როგორც ერთეულთა, ისე წყვილთა თანრიგშიც გაიმართა.
გამოვლინდნენ გამარჯვებულები და პრიზიორები, რომლებიც მედლებით, თასებითა და დიპლომებით დაჯილდოვდნენ.
– მნიშვნელოვანი ტურნირი იყო, ძლიერი მოთამაშეები შეგვხდნენ, მაგრამ საბოლოო ჯამში, მე და ჩემმა მეწყვილე ანასტასია ჩხარტიშვილმა მათ ვაჯობეთ და გავიმარჯვეთ. იმედი მაქვს, მომავალში კიდევ უფრო მეტი სპორტსმენი ჩაებმება ამ ტურნირში, – გვითხრა გამარჯვებულმა წყვილთა შორის თაკო რიჟვაძემ.
– ფინალში კარგი მოთამაშე შემხვდა, წინააღმდეგობა გავუწიე, თუმცა საბოლოოდ დავმარცხდი და ვიცე-ჩემპიონი გავხდი, მაგრამ დარწმუნებული ვარ, რომ შემდეგ ტურნირზე რევანშს ავიღებ და ოქროს დავეუფლები, – გვითხრა ვერცხლის მედალოსანმა მარი გორგაძემ.
მანანა ძიძიშვილი