მთავრობის კიდევ ერთი ხმაურიანი გადაწყვეტილება – თსუ-ს და სტუ-ს გაერთიანება
თბილისის სახელმწიფო უნივერსიტეტისა და ტექნიკური უნივერსიტეტის გაერთიანების იდეა განათლების მინისტრმა გივი მიქანაძემ 29 იანვარს გაახმაურა. ამ გადაწყვეტილებამ ვნებათაღელვა გამოიწვია. საქართველოს განათლების, მეცნიერების და ახალგაზრდობის მინისტრი გივი მიქანაძის განცხადებით, რეფორმის მთავარი მიზანი არის ბაზრის მოთხოვნიდან გამომდინარე სახელმწიფო უნივერსიტეტებში შესაბამისი პროფესიების უზრუნველყოფა, შესაბამისი მიმართულებებით ხარისხის განვითარება და გაუმჯობესება, რაც კურსდამთავრებულებს კონკურენტუნარიანს და ბაზრის მოთხოვნებთან შესაბამის გახდის, ასევე, გაუიოლებს სამსახურის მოძიებას და დასაქმებას მაღალანაზღაურებად მიმართულებებზე. მისივე მტკიცებით, თბილისის სახელმწიფო და საქართველოს ტექნიკური უნივერსიტეტების გაერთიანების შემდეგ, დეტალურად შეისწავლიან ყველა პროგრამას და იქ, სადაც ამ უნივერსიტეტებს შორის მსგავსი პროგრამები აღმოჩნდება, მოხდება ერთიან კომპონენტად შეჯერება და ადამიანური რესურსების მაქსიმალურად განაწილება ისე, რომ არცერთი აკადემიური პერსონალის წარმომადგენელი ამ უნივერსიტეტიდან არ დარჩეს უნივერსიტეტს მიღმა.
,,ამ საკითხთან დაკავშირებით უწყებათაშორისმა კომისიამ ცხრა თვის განმავლობაში იმუშავა და პრემიერის მიერ საჯაროდ წარდგენილი დოკუმენტი მიზნობრივ ჯგუფებთან მრავალგზის განხილვას დაექვემდებარა. მხოლოდ ამის შემდეგ მოხდა მისი დამტკიცება“, – აღნიშნა მიქანაძემ. მისივე თქმით „სწორედ ამ კონცეფციის ერთ-ერთი მთავარი მიზანია, მოხდეს ადამიანური და მატერიალურ-ტექნიკური რესურსების კოორდინირება, კონცენტრირება და გაერთიანება. ეს განსაკუთრებით ეხება ორ ჰაბს, რომელიც კონცეფციის შედეგად ჩამოყალიბდება – ეს არის თბილისი და ქუთაისი, სადაც მოხდება „ერთი ფაკულტეტი ერთ ქალაქში“ პრინციპის დაცვა და სწორედ ამ პრინციპიდან გამომდინარე უნდა მოხდეს კონკრეტული სახელმწიფო უნივერსიტეტების ადამიანური და მატერიალურ-ტექნიკური რესურსების გაერთიანება იმისთვის, რომ მოხდეს პროგრამების დადარება, საკადრო უზრუნველყოფა და ხარისხის გაუმჯობესება. ამ პრინციპს ემსახურება ის გადაწყვეტილება, რომლითაც სახელმწიფო უნივერსიტეტებს შორის ორი ყველაზე დიდი, ფლაგმანი უნივერსიტეტი – თბილისის
სახელმწიფო უნივერსიტეტი და საქართველოს ტექნიკური უნივერსიტეტი უნდა გაერთიანდეს რეორგანიზაციის საფუძველზე“, – თქვა მინისტრმა. როგორც მიქანაძემ აღნიშნა, დაგეგმილია წამყვანი პროფესორის პოზიციის ჩამოყალიბება, რომელიც შემდგომი თვეების განმავლობაში კონკრეტული კრიტერიუმების დაცვით, ღია საჯარო კონკურსის საფუძველზე შეირჩევა და კონკრეტული მიმართულებების ხელმძღვანელ პროფესორებს შეარჩევს. „წამყვანი პროფესორის პოზიცია არის დამატებითი პოზიცია და არ ჩაანაცვლებს არცერთ მოქმედ აკადემიურ პოზიციას. წამყვანი პროფესორის პოზიცია შემდგომი თვეების განმავლობაში, კონკრეტული კრიტერიუმების დაცვით, ღია საჯარო კონკურსის საფუძველზე შეირჩევა და კონკრეტული მიმართულებების ხელმძღვანელ პროფესორებს შეარჩევს“, – განმარტა მინისტრმა. რაც შეეხება რეორგანიზაციის პროცესს, მიქანაძის თქმით, მას შემდეგ, რაც კანონში ცვლილებები იქნება შეტანილი და რეორგანიზაცია შესაძლებელი გახდება, მინისტრის ბრძანებით შეიქმნება დროებითი მმართველი ორგანო – საბჭო, რომელშიც პარიტეტის დაცვით თანაბარი უფლებამოსილებით წარმოდგენილი იქნებიან როგორც თბილისის სახელმწიფო, ასევე საქართველოს ტექნიკური უნივერსიტეტების წარმომადგენლები. „სწორედ ისინი ავტონომიურობის პრინციპიდან გამომდინარე, განახორციელებენ რეორგანიზაციას იმისთვის, რომ ხარისხის გაუმჯობესების და რეფორმის მიზნებიდან გამომდინარე მაქსიმალურად უზრუნველყონ ის აქტივობები, რომელიც ორი უნივერსიტეტის უმტკივნეულოდ გაერთიანებას და შემდგომ ხარისხიან საქმიანობაზე იქნება ორიენტირებული“, – აღნიშნა განათლების მინისტრმა.
თბილისის სახელმწიფო უნივერსიტეტის და ტექნიკური უნივერსიტეტის გაერთიანებას სტუდენტების ნაწილის და სამოქალაქო აქტივისტების პროტესტი მოჰყვა. ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის პროფესორების ნაწილმა განცხადება გაავრცელა. 62 პროფესორიდან, რომელმაც გამოკითხვაში მიიღო მონაწილეობა, არცერთი არ ეთანხმება უნივერსიტეტების საქართველოს ტექნიკურ უნივერსიტეტთან გაერთიანების იდეას. ისინი მოითხოვენ, შეჩერდეს უნივერსიტეტის სტატუსსა და სტრუქტურასთან დაკავშირებული ცვლილება, ასევე, დაიწყოს კონსულტაციები აკადემიურ საზოგადოებასთან. ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის პროფესორების ღია წერილს უცვლელად გთავაზობთ: ,,მოგეხსენებათ, თბილისის სახელმწიფო უნივერსიტეტი არ არის მხოლოდ საგანმანათლებლო დაწესებულება, ის არის ჩვენი ეროვნული იდენტობის ნაწილი – საქართველოს ისტორია, წარსული, აწმყოცა და მომავალიც; ადგილი, რომელსაც ასეულობით ათასი ადამიანის როგორც პროფესიული, ისე პიროვნული მომავალი განუსაზღვრია; ადგილი, სადაც ყალიბდებოდა თანამედროვე ქართველი ერი. ამ წერილით კიდევ ერთხელ ვაფიქსირებთ, რომ თსუ არ არის უბრალოდ ინსტიტუცია, რომლის მომავალი მხოლოდ პროცედურულ, ან სამართლებრივ ჭრილში უნდა განიხილებოდეს. შესაბამისად, გადაწყვეტილების მიმღები პირებისგან მოვითხოვთ:
შეჩერდეს უნივერსიტეტის სტატუსსა და სტრუქტურასთან დაკავშირებული ნებისმიერი ნაჩქარევი, ფუნდამენტური ცვლილება, რომელიც განსაზღვრავს მის აწმყოსა და მომავალს
დაიწყოს ფართომასშტაბიანი, საჯარო და არგუმენტირებული კონსულტაციები აკადემიურ საზოგადოებასთან“, – აღნიშნულია წერილში.
ამასთან საქართველოს ტექნიკური უნივერსიტეტის აკადემიური და სამეცნიერო საზოგადოება „ქართული ოცნების“ საპატიო თავმჯდომარეს ბიძინა ივანიშვილს ღია წერილით მიმართავს. წერილი უნივერსიტეტის ვებგვერდზე გამოქვეყნდა. როგორც მასში აღნიშნულია, თბილისის სახელმწიფო და საქართველოს ტექნიკური უნივერსიტეტების შესაძლო გაერთიანება არ გამომდინარეობს „უმაღლესი განათლების სისტემის ეროვნული კონცეფციის“ არსიდან, მიზნებიდან და ლოგიკიდან. „საქართველოს ტექნიკური უნივერსიტეტი პატივისცემით ეკიდება უმაღლესი განათლების სისტემაში რეფორმების განხორციელების აუცილებლობას და მიესალმება იმ პრინციპებს, რომლებიც დეკლარირებულია „უმაღლესი განათლების სისტემის ეროვნული კონცეფციით“. თუმცა ივანე ჯავახიშვილის სახელობის თბილისის სახელმწიფო უნივერსიტეტისა და საქართველოს ტექნიკური უნივერსიტეტის შესაძლო გაერთიანება არ გამომდინარეობს აღნიშნული კონცეფციის არსიდან, მიზნებიდან და ლოგიკიდან, შესაბამისად, ვერ მივიღებთ იმ შედეგს, რაც რეფორმითაა განსაზღვრული. სამწუხაროდ, დღემდე აკადემიურ საზოგადოებას არ გასცნობია რეფორმის კონცეპტუალური დოკუმენტები, მისი განხორციელების მოდელი, ვადები, ფინანსური უზრუნველყოფის გარანტიები (მექანიზმები), სამეცნიერო კომპონენტი ან რეფორმის შემმუშავებელთა პროფესიული შემადგენლობა. მით უფრო იმის გათვალისწინებით, რომ საქართველოს ტექნიკური უნივერსიტეტის აკადემიური და სამეცნიერო საზოგადოება დაკომპლექტებულია როგორც საქართველოში, ისე საერთაშორისო აკადემიურ სივრცეში აღიარებული მეცნიერებითა და მკვლევრებით, თუმცა მათ არ ჰქონიათ შესაძლებლობა, მონაწილეობა მიეღოთ აღნიშნული რეფორმის განხილვასა და ფორმირებაში. ტექნიკური უნივერსიტეტი საქართველოს კულტურული მემკვიდრეობის ძეგლადაც შეიძლება ჩაითვალოს, რომელიც ერთადერთი საინჟინრო-ტექნოლოგიური ცოდნის ტაძარია საქართველოში. მისი არსებობის 104-წლიანი ისტორიის განმავლობაში ნახევარ მილიონზე მეტი პროფესიონალი ინჟინერი გაუზარდა საქართველოს, რომელმაც შექმნა და ფეხზე დააყენა ეს ქვეყანა და ასეთ დამოკიდებულებას არც ჩვენი ისტორია, არც აწმყო და არც მომავალი არ იმსახურებს. ჩვენ ვერ ვიქნებით თაობა, რომელმაც დაუშვა ცოდნის ტაძრის დანგრევა და ქვეყნის დაბრუნება 100 წლით უკან, უფესვებო, უმომავლო საქართველოში“, – ნათქვამია წერილში.
ახალ გადაწყვეტილებასთან დაკავშირებით განათლების სამინისტროსა და თბილისის სახელმწიფო უნივერსიტეტის აკადემიური საბჭოს წევრებს შორის შეხვედრა შედგა. საბჭოს წევრი თამარ ვეფხვაძე აცხადებს, რომ განათლების სამინისტროში თსუ-ს წარმომადგენლებთან ძალიან საჭირო შეხვედრა გაიმართა და უმჯობესი იყო, ასეთი შეხვედრა უფრო ადრეც გამართულიყო.
როგორც თამარ ვეფხვაძემ ჟურნალისტებს განუცხადა, შეხვედრაზე დაისვა მწვავე კითხვები. მისივე განცხადებით, შეხვედრაზე იყო პოზიტიური ნიშნები, თუმცა, როგორც განმარტა, ეს არ ეხება თბილისის სახელმწიფო უნივერსიტეტისა და საქართველოს ტექნიკური უნივერსიტეტის არგაერთიანებას, რადგან აღნიშნული ორი უნივერსიტეტის გაერთიანებასთან დაკავშირებით სახელმწიფოს მხრიდან გადაწყვეტილება უკვე მიღებულია. თამარ ვეფხვაძის თქმით, ახლა მიმდინარეობს მსჯელობა დეტალებზე, რომ პროცესი მინიმალურად მტკივნეული იყოს. „ეს იყო ძალიან საჭირო შეხვედრა, მიმაჩნია, ცოტა დაგვიანებულიც. უპრიანი იყო, უფრო ადრეც ყოფილიყო ამ ფორმატში შეხვედრები. დაისვა ძალიან ბევრი მწვავე შეკითხვა. გარკვეული პოზიტიური და იმედისმომცემი ნიშნები ნამდვილად იყო. რომ არ გაერთიანდება – არა, უკვე ძალიან ცალსახად განაცხადა სახელმწიფომ, რომ ეს ეს გადაწყვეტილება მიღებულია. ახლა მსჯელობა მიდის დეტალებზე და იმაზე, რომ პროცესი იყოს მინიმალურად მტკივნეული“, – განაცხადა თამარ ვეფხვაძემ.
ტექნიკური უნივერსიტეტის და თსუ-ს გაერთიანების ვადას რაც შეეხება, ალბათ მინიმალური იქნება ექვსი თვე, თუმცა შეიძლება, ის გაგრძელდეს გასაგები მიზეზების გამო, რეორგანიზაციის პროცესის ვადაში ჩაკეტვა არსად ხდება, – ამის შესახებ საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ განაცხადა. მისი თქმით, ასევე, შესაძლებელია, რომ პროგრამების დადარების ნაწილშიც ბევრი პრობლემა იყოს. როგორც მინისტრის მოადგილემ განაცხადა, ტექნიკური უნივერსიტეტის წარმომადგენლების პოზიცია არის ძალიან იმპერატიული, რომ შენარჩუნებული იყოს საქართველოს ტექნიკური უნივერსიტეტის ბრენდი.
„ვადასტურებთ ჩვენს პატივისცემას. მოგეხსენებათ, რომ საქართველოს ტექნიკური უნივერსიტეტი წელს 104 წლის გახდა. 6 თებერვალს ქვეყანაში მინისტრის დაბრუნებასთან ერთად დაიწყება შეხვედრები მინისტრთანაც და შესაბამისი საბოლოო გადაწყვეტილებები, ალბათ, იქით კვირაში იქნება მიღებული. მოგეხსენებათ, რომ ოქტომბერში დაანონსებული იქნა უმაღლესი განათლების ფუნდამენტური რეფორმა. მოგეხსენებათ, რომ ეს რეფორმა თვითონ პრემიერ-მინისტრმა დააანონსა. ასეთი ტიპის რეფორმა 30 წლის განმავლობაში ქვეყანაში არ განხორციელებულა და, შესაბამისად, მისი აღსრულების ეტაპი დადგა. დავიწყეთ კონკრეტული ნაბიჯების გადადგმა, რომ შვიდი გამოწვევა, რაც მითითებულია კონცეფციაში, დაძლეული იქნეს. შესაბამისად, არის გარკვეული ტიპის საკადრო საკითხებიც, ინფრასტრუქტურული საკითხები, ასევე ინსტიტუციური საკითხები, რომლებიც აუცილებელია, რომ რეფორმის დროს იქნეს გათვალისწინებული. ერთ-ერთი ასეთი გადაწყვეტილება გახლავთ სამინისტროს მიერ გაჟღერებული, ორი უნივერსიტეტის გაერთიანების იდეა, რაც საშუალებას მოგვცემს, აღნიშნული უნივერსიტეტი კიდევ უფრო გაძლიერდეს, დაემატოს ტექნიკურ-ტექნოლოგიური სკოლის მიმართულება, რომელიც ძალიან ძლიერია საქართველოს ტექნიკურ უნივერსიტეტში. მათ აქვთ უზარმაზარი ისტორიული გამოცდილება, ჰყავთ პროფესიონალი კადრები. შესაბამისად, მათი გამოცდილება ერთ დიდ ფლაგმან უნივერსიტეტს ძალიან გააძლიერებს და, საბოლოო ჯამში, მივიღებთ არა მარტო საქართველოში, არამედ, ჩვენი ვარაუდით, აღმოსავლეთ ევროპაში ერთ-ერთ ლიდერ უნივერსიტეტს“, – განაცხადა გაბისონიამ.
მოამზადა ხატია იაშვილმა
გალერეა
