„ოპოზიციის ალიანსი“ ეროვნული მობილიზაციის კამპანიას იწყებს

საქართველოს უახლესი ისტორიის ერთ-ერთ მნიშვნელოვან თარიღთან დაკავშირებით, „ოპოზიციის ალიანსი“ სპეციალურ განცხადებას ავრცელებს და საზოგადოებას აქტიური ჩართულობისკენ მოუწოდებს.
განცხადებაში აღნიშნულია, რომ 35 წლის წინ, 31 მარტს, საქართველოს მოქალაქეებმა ქვეყნის მთელ ტერიტორიაზე,  მათ შორის, აფხაზეთსა და სამაჩაბლოში გამოხატეს თავიანთი ურყევი ნება საქართველოს დამოუკიდებლობის აღდგენის შესახებ, რომელიც ჯერ კიდევ 1918 წლის 26 მაისს გამოცხადდა.
როგორც განცხადებაშია ნათქვამი, ორივე ეს თარიღი – 31 მარტი და 26 მაისი – დამოუკიდებელი საქართველოს ისტორიაში უმნიშვნელოვანეს მოვლენებს წარმოადგენს და უკავშირდება ქართველი ერისთვის ერთ-ერთ მთავარ გამოწვევას – სახელმწიფოებრივი დამოუკიდებლობის საკითხს.
„ჩვენ გვჯერა, რომ დღესაც საქართველო იდენტური გამოწვევის წინაშე დგას. სწორედ ამიტომ, დღეს, 31 მარტს ოპოზიციის ალიანსი ვიწყებთ ერთობლივ, ეროვნული მობილიზაციის კამპანიას. ეს არის „ოპოზიციის ალიანსის“ ინიციატივა, მაგრამ ეს საქმე არ არის ექსკლუზიურად ჩვენი გასაკეთებელი, ეს არის ყველას გასაკეთებელი საქმე.
ჩვენი მიზნები ძალიან მარტივია: პირველი, უნდა გავზარდოთ პირდაპირი, პირისპირი კომუნიკაცია მოქალაქეებთან; მეორე – უნდა გავანეიტრალოთ რეჟიმის პროპაგანდა. დღეს ორი მთავარი იარაღი, რაც ამ რეჟიმს აქვს, არის ტყუილი და შიში; მესამე – ის ბრაზი, პროტესტი და ცვლილების სურვილი, რომელიც უკვე წლებია არსებობს საზოგადოებაში, უნდა გადავაქციოთ რეალურ პოლიტიკურ ქმედებად; მეოთხე – უნდა დავამარცხოთ შიში, რომელიც ამ რეჟიმმა წლების განმავლობაში მიზანმიმართულად დანერგა. უნდა გავზარდოთ პროტესტში ჩართული ადამიანების რაოდენობა, ცვლილება არ ხდება მხოლოდ საუბრით, ცვლილებისთვის აუცილებელია, რომ ყველა ერთად დავდგეთ, ზუსტად ისე, როგორც ეს მოხდა 35 წლის წინ, 31 მარტის რეფერენდუმზე.
ეს კამპანია გაგრძელდება ორი თვის განმავლობაში და მისი სიმბოლური კულმინაცია იქნება 26 მაისს – საქართველოს დამოუკიდებლობის დღეს თბილისში დაგეგმილი დიდი, ხალხმრავალი აქცია.
ჩვენთვის, საქმისთვის, გამარჯვებისთვის, ძალიან მნიშვნელოვანია, რომ ამ კამპანიაში ჩაერთონ სხვა პოლიტიკური თუ სამოქალაქო ჯგუფებიც, ისევე, როგორც აქტიური მოქალაქეები. გვინდა, მადლობა ვუთხრათ იმ ადამიანებს, ვინც დღეს პატიმრობაში, ტყვეობაში იმყოფებიან, ვინც იყვნენ ტყვეობაში და გათავისუფლდნენ, ვინც აწამეს, მოწამლეს, ფიზიკურად გაუსწორდნენ, ვინც დაკარგეს სამსახური, შემოსავალი, ვისაც ცხოვრება დაუნგრიეს; ყველას, ვინც ყოველდღე დგას რუსთაველზე, ბათუმში, ქუთაისში, ზუგდიდში, გორში, ჩხოროწყუში თუ სხვა ქალაქებში; ყველას, ვინც მონაწილეობას იღებს შაბათის მარშებში თბილისში. ჩვენთვის პატივია, ვიყოთ ამ ბრძოლაში თქვენთან ერთად.
ჩვენ არავის ვპირდებით მარტივ გზას, არავის ვპირდებით სასწაულებს. მაგრამ ერთი რამ ვიცით ზუსტად: თუ ჩვენ გავჩერდებით, ცვლილება არ იქნება, თუ ვიმოქმედებთ, რეჟიმის ცვლილება იქნება მხოლოდ დროისა და ფასის საკითხი. ამიტომ ყველას გთავაზობთ, აქტიურად ჩაერთოთ ამ კამპანიაში, ხოლო ორი თვის თავზე, 26 მაისს, ყველანი კიდევ ერთხელ შევიკრიბოთ თბილისში“, – ნათქვამია „ოპოზიციის ალიანსის“ განცხადებაში.