მიხეილ სარჯველაძე – ოპოზიციის განცხადებები პენსიების გაზრდაზე უპასუხისმგებლო პოპულიზმია

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა მიხეილ სარჯველაძემ ტელეკომპანია „რუსთავი 2“-ის ეთერში პენსიების ზრდის თემაზე ისაუბრა. მისი შეფასებით, ოპოზიციის მხრიდან გაკეთებული განცხადებები უპასუხისმგებლოა, „აღვირახსნილი პოპულიზმია“ და მათ არანაირი პრაგმატული თუ მეცნიერული გათვლა არ უდევს საფუძვლად.

მიხეილ სარჯველაძის თქმით, სოციალური საკითხები, მათ შორის, პენსია, ოპოზიციის მხრიდან ხშირად ხდება პოლიტიკური სპეკულაციისა და პარაზიტირების საგანი.

„დასანანი და სამწუხარო რეალობაა, როდესაც სრულიად უპასუხისმგებლოდ, ყველას შეუძლია განცხადებების კეთება. ამის მიღმა არაფერი დგას. არავითარი რეალური, პრაგმატული თუ მეცნიერული გათვლა არ უდევს საფუძვლად განცხადებებს იმის შესახებ, თუ რატომ არ უნდა იყოს პენსია, მაგალითად, ათჯერ მეტი“, – აღნიშნა მინისტრმა.

ჯანდაცვის უწყების ხელმძღვანელმა ხაზი გაუსვა, რომ ამ საკითხზე პასუხისმგებლიანი პოზიცია პრემიერ-მინისტრმა დააფიქსირა, როდესაც საზოგადოებას ბიუჯეტის დაგეგმვის პრინციპები დეტალურად განუმარტა. სარჯველაძის განცხადებით, ბიუჯეტში სოციალურ ხარჯებს თავისი განსაზღვრული ზღვარი აქვს და აუცილებელია ისეთი ინფრასტრუქტურული თუ ეკონომიკური პროექტების დაფინანსებაც, რომლებიც მომავალში ქვეყნის შემდგომ განვითარებას უზრუნველყოფს.

„თუ ყველაფერს ერთბაშად წლევანდელ სოციალურ საჭიროებებზე დავხარჯავთ, მომავალ წელს ეს რესურსი უბრალოდ აღარ იარსებებს. ამიტომ, როდესაც ვინმე ათმაგი პენსიის დარიგების საჭიროებაზე საუბრობს, მას ევალება ახსნას, რას უნდა მოაკლდეს ეს თანხა. ამის შემდეგ შეგვიძლია აზრი ვკითხოთ საერთაშორისო ფინანსურ ინსტიტუტებს, რომელთა რჩევაც პროცესის სწორედ ასე დაგეგმვაა“, – განაცხადა მიხეილ სარჯველაძემ.