ბათუმი „თოფუზის“ მე-18 საერთაშორისო ფესტივალს მასპინძლობს

ქალაქში ანიმაციის მოყვარულებს რამდენიმე დღის განმავლობაში მსოფლიოს სხვადასხვა ქვეყანაში შექმნილი ფილმების ნახვის შესაძლებლობა აქვთ. საერთაშორისო ფესტივალი ბათუმს კიდევ ერთხელ აქცევს სივრცედ, სადაც ერთმანეთს კინო, თანამედროვე ტექნოლოგიები, შემოქმედება და სხვადასხვა ქვეყნის ანიმაციის სკოლები ხვდება.
ფესტივალის წლევანდელი პროგრამა 100-ზე მეტ ანიმაციურ ფილმს აერთიანებს. მაყურებელს შესაძლებლობა აქვს, გაეცნოს როგორც პროფესიონალი ავტორების ნამუშევრებს, ისე სტუდენტურ, სადებიუტო, ექსპერიმენტულ და საბავშვო ანიმაციებს.

„თოფუზის“ პროგრამა მხოლოდ ფილმების ჩვენებებით არ შემოიფარგლება. ფესტივალის ფარგლებში იმართება მასტერკლასები, ვორქშოპები და შეხვედრები, რაც ქართველი და უცხოელი ანიმატორებისთვის გამოცდილების გაზიარებისა და პროფესიული ურთიერთობების გაღრმავების შესაძლებლობას ქმნის.
ფესტივალის მიმართ განსაკუთრებული ინტერესი იგრძნობა ბავშვებისა და მშობლების მხრიდანაც. ბათუმელი მშობლებისთვის „თოფუზი“ შვილებთან ერთად ხარისხიანი და საინტერესო ანიმაციების ნახვის შესაძლებლობაა. ანიმაციის მოყვარული ბათუმელი მაყურებელი წლევანდელ პროგრამას განსაკუთრებით ელოდებოდა.
„ანიმაციები ბავშვობიდან მიყვარს და ჩემთვის სასიამოვნოა, რომ ასეთი ფესტივალი ბათუმში ტარდება. წელს შვილებთან ერთად ვაპირებ რამდენიმე სეანსზე მისვლას. ვფიქრობ, ბავშვებისთვის ეს მხოლოდ გართობა არ არის – კარგი ანიმაცია მათ წარმოსახვასა და ინტერესს სხვა სამყაროების მიმართაც აღვივებს“, – ამბობს ბათუმელი მშობელი ლეილა ბერიძე.
კიდევ ერთი ფესტივალის სტუმარი აღნიშნავს, რომ „თოფუზის“ განსაკუთრებული ხიბლი სწორედ ოჯახთან მისი გაზიარების შესაძლებლობაა:
„ჩემი შვილები ანიმაციებს ძალიან ელოდებიან და ფესტივალის პროგრამას ერთად ვარჩევთ. ჩემთვის მნიშვნელოვანია, რომ ბავშვებს გასართობი ფილმების გარდა ისეთი ნამუშევრებიც ვაჩვენოთ, რომლებიც საინტერესო ისტორიებსა და განსხვავებულ იდეებს სთავაზობს. ვფიქრობ, „თოფუზი“ ამის კარგი შესაძლებლობაა“, – გვითხრა ელზა ბარამიძემ.
წლევანდელ პროგრამაში განსაკუთრებული ყურადღება თანამედროვე ციფრულ ტექნოლოგიებსაც ეთმობა. ფესტივალის ერთ-ერთი მნიშვნელოვანი მიმართულებაა ახალგაზრდების დაინტერესება ანიმაციით და მათთვის ამ სფეროში არსებული შესაძლებლობების გაცნობა.
„თოფუზის“ კონკურსში წარმოდგენილ ნამუშევრებს საერთაშორისო ჟიური შეაფასებს და გამარჯვებულებს რამდენიმე ნომინაციაში გამოავლენს. კონკურსი ახალგაზრდა და გამოცდილ ანიმატორებს საშუალებას აძლევს, საკუთარი ნამუშევრები საერთაშორისო აუდიტორიას წარუდგინონ და სხვადასხვა ქვეყნის პროფესიონალებთან დაამყარონ შემოქმედებითი კავშირები.
„თოფუზის“ ძირითადი პროგრამა ბათუმში 7-დან 10 ოქტომბრის ჩათვლით მიმდინარეობს. ფესტივალი 10 ოქტომბერს საზეიმოდ დაიხურება.