ბენიამინ ნეთანიაჰუ: ირანი ახლა ისრაელზე თავდასხმას ვერ ბედავს, რადგან რეჟიმი არასდროს ყოფილა ასეთი სუსტი

ისრაელის პრემიერ-მინისტრ ბენიამინ ნეთანიაჰუს განცხადებით, შემთხვევითი არ არის, რომ ირანი ამ ეტაპზე ისრაელზე თავდასხმას არ ახორციელებს. მისი თქმით, 2023 წლის 7 ოქტომბრის შემდეგ, ისრაელის მიერ განხორციელებულმა სამხედრო ოპერაციებმა ირანისგან მომდინარე საფრთხე მნიშვნელოვნად შეასუსტა.

ნეთანიაჰუს შეფასებით, ირანის რეჟიმი ახლა მძიმე მდგომარეობაშია და საკუთარი გადარჩენისთვის იბრძვის. ის მიიჩნევს, რომ ისრაელს შესაძლებლობა აქვს, ირანის მხრიდან მომდინარე საფრთხე საბოლოოდ აღმოფხვრას და რეჟიმი დაამხოს.

„რეჟიმი ახლა მერყეობს. ის არასდროს ყოფილა ასეთი სუსტი. ის საკუთარი გადარჩენისთვის იბრძვის. დარწმუნებული ვარ, რომ ჩვენ შეგვიძლია, ეს საფრთხე ერთხელ და სამუდამოდ აღმოვფხვრათ, სხვა სიტყვებით რომ ვთქვათ, დავამხოთ ეს რეჟიმი. ეს არის მთავარი მისია, რომელიც ჯერ კიდევ ჩვენ წინაშეა, მაგრამ ის ახლოსაა. ეს შეუძლებელი არ არის, ეს მიღწევადია. მათ იციან ჩვენი ძალა, ჩვენი დარტყმების ძალა და ჩვენი გადაწყვეტილების სიმტკიცე. ისინი ყველას ესხმიან თავს, ჩვენ გარდა. ჩვენთან თამაში არ ღირს. თუ რამე ისწავლეთ, ეს უნდა იყოს – ჩვენთან თამაში არ ღირს. ჩვენ გვაქვს ძალა, გადაწყვეტილების სიმტკიცე და შიდა ერთიანობა, რათა დაგამხოთ“, – მიმართა  ნეთანიაჰუმ ირანს.