ირანმა აშშ-ს ახალი სამშვიდობო წინადადება წარუდგინა
ირანმა აშშ-ს ახალი სამშვიდობო წინადადება წარუდგინა, რომელიც ჰორმუზის სრუტის გახსნასა და ცეცხლის შეწყვეტის რეჟიმის გაგრძელებას ითვალისწინებს, ბირთვულ პროგრამაზე მოლაპარაკებები კი უნდა გადავადდეს, – ამის შესახებ ინფორმაციას გამოცემა „აქსიოსი“ წყაროებზე დაყრდნობით ავრცელებს.
ერთ-ერთი წყაროს თქმით, გასული კვირის განმავლობაში ირანის საგარეო საქმეთა მინისტრმა, აბას არაღჩიმ შუამავლებს, პაკისტანს, ეგვიპტეს, თურქეთსა და კატარს აცნობა, რომ თეირანში ჯერ კიდევ არ არის შეთანხმება, თუ როგორ უპასუხონ ამერიკის მოთხოვნებს.
როგორც „აქსიოსი“ წერს, ახალი წინადადება პაკისტანის მეშვეობით გადაეცა ვაშინგტონს, ის ჰორმუზის კრიზისის მოგვარებაზეა ორიენტირებული. ბირთვულ საკითხზე მოლაპარაკებები კი მხოლოდ მოგვიანებით დაიწყება – ჰორმუზის სრუტის გახსნის, ბლოკადის მოხსნისა და ცეცხლის შეწყვეტის შესახებ ახალი შეთანხმების მიღწევის შემდეგ.
გამოცემის ინფორმაციით, თეთრმა სახლმა წინადადება მიიღო, თუმცა ჯერ გაურკვეველია, განიხილავს თუ არა მას ვაშინგტონი.
ამასთან, როგორც „აქსიოსი“ წყაროებზე დაყრდნობით განმარტავს, დონალდ ტრამპი დღეს ირანის საკითხზე უსაფრთხოების გუნდს შეხვდება.