სტიქიური უბედურებებით გამოწვეული გლობალური ზარალი წელიწადში $450 მილიარდს მიაღწევს

„ბუნებრივი კატაკლიზმები მსოფლიო ეკონომიკას საშუალოდ, წელიწადში დაახლოებით 450 მილიარდი დოლარის ზარალს მიაყენებს, დაზღვევა კი ამ ზარალის ნახევარსაც კი ვერ დაფარავს“, – წერს Financial Times-ი კომპანია Verisk-ის კვლევაზე დაყრდნობით.

ანალიტიკოსების შეფასებით, ზარალის 62%-ს – დაახლოებით 279 მილიარდ დოლარს, სადაზღვევო კომპანიები არ აანაზღაურებენ. ეს ხარჯები უძრავი ქონების მფლობელებს, კომპანიებსა და სახელმწიფოებს დააწვებათ ტვირთად.

ზარალის უდიდესი ნაწილი – 235 მილიარდი დოლარი, აშშ-ს მიადგება, სადაც მექსიკის ყურეში ყოველწლიურად ხდება ქარიშხლების სეზონი, ტყის ხანძრები და მიწისძვრები – კალიფორნიაში. მეორე ადგილზე Verisk-მა ევროპა (110 მილიარდი) დააყენა, სადაც სულ უფრო ხშირად ფიქსირდება წყალდიდობები ან ექსტრემალური სიცხის ტალღები. მესამე ადგილზეა აზია (71 მილიარდი): მხოლოდ 2025 წლის მარტში მიანმარში მომხდარმა მიწისძვრამ 12 მილიარდი დოლარის ზარალი მოიტანა.

ექსპერტების აზრით, ზარალის თანხა კლიმატის ცვლილებისა და ქალაქების ზრდის გამო გაიზარდა. ბევრი უძრავი ქონება ხვდება სტიქიური უბედურებებისადმი მიდრეკილ რაიონებში. ამასთან ერთად, ძვირდება საცხოვრებლის მშენებლობა, რის შედეგადაც, სადაზღვევო კომპანიები ნაკლებ რისკს იღებენ საკუთარ თავზე. ზოგიერთ ქვეყანაში სახლები და საწარმოები თავიდანვე, პრაქტიკულად დაუზღვეველია.