სურსათის ეროვნული სააგენტო მონიტორინგის შედეგებს ასაჯაროებს

სურსათის ეროვნულმა სააგენტომ დედაქალაქის საბავშვო ბაგა-ბაღებში განხორციელებული კომპლექსური მონიტორინგის საბოლოო შედეგები გამოაქვეყნა. უწყების ოფიციალური ინფორმაციით, ლაბორატორიული კვლევისთვის აღებული 694-ვე ნიმუშის პასუხი ცნობილია და თითოეული მათგანი სურსათის უვნებლობის დადგენილ სტანდარტებსა და ნორმებს სრულად შეესაბამება.

შემოწმების აუცილებლობა თბილისის საბავშვო ბაგა-ბაღების აღსაზრდელთა შორის ნოროვირუსით გამოწვეული გასტროენტერიტის შემთხვევების დაფიქსირებამ განაპირობა. პრობლემის წარმოშობისთანავე, სააგენტომ მყისიერი მოკვლევა დაიწყო.

როგორც უწყებაში განმარტავენ, ინსპექტირების ჯგუფებმა საბავშვო ბაღების კვების ბლოკებთან ერთად, ხორცისა და რძის პროდუქტების მწარმოებელი საწარმოებიც შეამოწმეს. ლაბორატორიულად გაანალიზდა სხვადასხვა დასახელების პროდუქტი: ხილ-ბოსტნეული, რძის ნაწარმი (ყველი, რძის ფხვნილი, ულტრაპასტერიზებული რძე, კარაქი, არაჟანი), საქონლისა და ქათმის ხორცი, მარცვლეული, მზა კერძები და სასმელი წყალი.

„კვლევა განხორციელდა ისეთ მაჩვენებლებზე, როგორებიცაა: მძიმე ლითონები, ნიტრატები, მიკრობიოლოგიური პარამეტრები და პათოგენები, მათ შორის: აერობული მიკროორგანიზმები, კოლიფორმები, სალმონელა, შიგელა და კოაგულაზა-დადებითი სტაფილოკოკი“, – აღნიშნულია სურსათის ეროვნული სააგენტოს განცხადებაში.

მასშტაბური ლაბორატორიული ექსპერტიზის შედეგად, არანაირი დარღვევა არ გამოვლენილა. შესაბამისად, ოფიციალურად დადასტურდა, რომ სკოლამდელ დაწესებულებებში საბავშვო კვებისთვის განკუთვნილი პროდუქცია სრულიად უვნებელია და ბავშვთა ჯანმრთელობას საფრთხეს არ უქმნის.