ფიდეს ქალთა მსოფლიო თასის გათამაშება დაიწყო

გუშინ ბათუმში სტარტი აიღო ფიდეს ქალთა მსოფლიო თასის გათამაშებამ. ასპარეზობა საერთაშორისო საჭადრაკო ფედერაციის (ფიდე), საქართველოსა და აჭარის ჭადრაკის ფედერაციების ორგანიზებით ტარდება. ღონისძიების მხარდამჭერებია: საქართველოს სპორტის სამინისტრო, აჭარის მთავრობა, აჭარის განათლებისა და სპორტის სამინისტრო, ქალაქ ბათუმის მერია, აჭარის ჯანდაცვის სამინისტრო, აჭარის ტურიზმისა და კურორტების დეპარტამენტი.

საქართველოდან შვიდი მოჭადრაკე ასპარეზობს – ნანა ძაგნიძე, ნინო ბაციაშვილი, მერი არაბიძე, ლელა ჯავახიშვილი, ბელა ხოტენაშვილი, ანასტასია კირთაძე, კესარია მგელაძე. მათ შორის ორი – ნინო ბაციაშვილი და კესარია მგელაძე აჭარიდან არიან.

ტურნირის პირველ ეტაპზე სამმა ქართველმა იასპარეზა და სამივემ პირველი პარტია გამარჯვებით დაასრულა.

კესარია მგელაძემ ვიეტნამელი საერთაშორისო ოსტატი დაამარცხა, ბელა ხოტენაშვილმა – ანგოლელი ქალთა საერთაშორისო ოსტატი, ხოლო ანასტასია კირთაძემ ესპანეთის სახელით მოასპარეზე ანა მათნაძეს მოუგო.

დღეს 15 საათზე პირველი ტურის მეორე ეტაპი გაიმართება.

 

მანანა ძიძიშვილი