არჩილ ბერიძე: ჩვენი არჩევანი მშვიდობა, ღირსება და ძლიერი სახელმწიფოა
საქართველოს პარლამენტის პლენარულ სხდომაზე საპარლამენტო უმრავლესობის წევრმა არჩილ ბერიძემ ვრცელი სიტყვა წარმოთქვა, რომელიც 2012 წლის ხელისუფლების ცვლილებიდან გასულ 14 წელსა და ქვეყნის განვითარების ეტაპებს მიუძღვნა.
დეპუტატის განცხადებით, ბიძინა ივანიშვილის ლიდერობით განხორციელებული ხელისუფლების მშვიდობიანი ცვლილება იყო ქართველი ხალხის ისტორიული არჩევანი ადამიანის ღირსების, მშვიდობისა და დამოუკიდებელი საქართველოს სასარგებლოდ, რამაც „ნაციონალური მოძრაობის“ მმართველობა დაასრულა.
„დღეს, როცა წარსულისა და აწმყოს გათანაბრებას ცდილობენ, უნდა ვთქვათ, საიდან მოვედით და რა მივიღეთ ამ თოთხმეტი წლის თავზე,“ – აღნიშნა არჩილ ბერიძემ. მან ხაზი გაუსვა, რომ გასული წლების უპირველესი მონაპოვარი ადამიანის უფლებების დაცვა, სიტყვისა და გამოხატვის თავისუფლება, ბიზნესის ხელშეუხებლობა და შიშისგან თავისუფალი გარემოა.
დეპუტატის თქმით, უკრაინაში მიმდინარე ომისა და რეგიონში არსებული მძიმე მოვლენების ფონზე, უწყვეტი მშვიდობისა და რეალური სუვერენიტეტის შენარჩუნებას განსაკუთრებული ფასი აქვს, რადგან საქართველოს შესახებ გადაწყვეტილებები დღეს უშუალოდ ქვეყნის შიგნით, ქართველი ხალხის ინტერესებიდან გამომდინარე მიიღება. მან ასევე ისაუბრა კორუფციასთან ბრძოლასა და კანონის უზენაესობაზე, სადაც, მისი თქმით, პოლიტიკური კუთვნილებისა და თანამდებობის მიუხედავად, პასუხისმგებლობისგან არავინ თავისუფლდება.
სოციალურ ინიციატივებზე საუბრისას ბერიძემ გამოყო პრემიერ-მინისტრის ახალი გადაწყვეტილებები, რომლებიც პენსიონერებსა და დევნილ ოჯახებს ეხება. კერძოდ, 2027 წლიდან 70 წლამდე ასაკის პენსიონერებისთვის პენსია 20 ლარის ნაცვლად 45 ლარით გაიზრდება, ხოლო დევნილ ოჯახებს საცხოვრებლის მიღების სანაცვლოდ, შეეძლებათ თითოეულ წევრზე 10 000 ლარის ოდენობის კომპენსაცია აირჩიონ.
როგორც ხელოვნების სფეროდან პოლიტიკაში მოსულმა წარმომადგენელმა, არჩილ ბერიძემ განსაკუთრებული ყურადღება დაუთმო კულტურული მემკვიდრეობის დაცვას. მან აღნიშნა ბიძინა ივანიშვილისა და ფონდ „ქართუს“ დამსახურება ტაძრების, თეატრებისა თუ მუზეუმების აღდგენაში, ლევილის მამულის მოვლა-პატრონობასა და იოანე-ზოსიმეს ხელნაწერის საქართველოში დაბრუნებაში.
გამოსვლის დასასრულს დეპუტატმა აღნიშნა, რომ ქვეყნის უმთავრეს მიზნად რჩება საქართველოს ტერიტორიული მთლიანობის აღდგენა, აფხაზეთსა და ცხინვალის რეგიონში მშვიდობიანად დაბრუნება, ნდობის აღდგენა და საერთო, ძლიერი მომავლის შენება.