დიუშენის კუნთოვანი დისტროფიის მქონე ბავშვების მშობლები მედიკამენტსა და მულტიდისციპლინური გუნდის შექმნას ითხოვენ
დიუშენის კუნთოვანი დისტროფიით დაავადებული ბავშვების მშობლები მედიკამენტებზე ხელმისაწვდომობასა და მულტიდისციპლინური გუნდის შექმნას ითხოვენ. აღნიშნული მოთხოვნებით ისინი მთავრობის კანცელარიასთან საპროტესტო აქციას განაგრძობენ.
ორგანიზაცია „ერთად ვებრძოლოთ დიუშენის კუნთოვან დისტროფიას“ თავმჯდომარის ზაქრო გვიშიანის განცხადებით, საქართველოში უკვე რეგისტრირებულია ერთ-ერთი მედიკამენტი, რომელმაც გაიარა უსაფრთხოების ყველა ეტაპი, თუმცა მისი ხელმისაწვდომობა კვლავ პრობლემად რჩება. მშობლები მიიჩნევენ, რომ ბავშვებს უნდა ჰქონდეთ სრული სამედიცინო მომსახურება და თანამედროვე მკურნალობის მიღების შესაძლებლობა.
მათი თქმით, განსაკუთრებით მნიშვნელოვანია მულტიდისციპლინური გუნდის შექმნა, რომელიც დაავადებასთან დაკავშირებული გართულებების დროულ მართვას უზრუნველყოფს. მიუხედავად უწყებებთან გამართული შეხვედრებისა, აღნიშნული გუნდი ამ დრომდე არ შექმნილა.
მშობლების განცხადებით, იშვიათი დაავადებების მართვა მხოლოდ მედიკამენტით არ შემოიფარგლება, საჭირო არის კოორდინირებული, მრავალპროფილური მიდგომა, რათა პაციენტებს რეალური შანსი მიეცეთ სიცოცხლის ხარისხის გაუმჯობესებისა და დაავადების პროგრესის შენელებისთვის.