საერთაშორისო კულტურულ პროექტებში მონაწილე ხელოვანებთან შეხვდნენ
აჭარის მთავრობის თავმჯდომარე ზურაბ პატარაძე და აჭარის კულტურის მინისტრი ელისო ბოლქვაძე საერთაშორისო კულტურულ პროექტებში მონაწილე ხელოვანებს შეხვედნენ.
შეხვედრაზე გერმანიაში აჭარის სახელმწიფო ვოკალური ანსამბლ „ბათუმის“ 35 წლის საიუბილეო ტურნე, ვატიკანში ბათუმის სახელმწიფო მუსიკალური ცენტრის კაპელას სოლო კონცერტი და პარიზში, ლუვრის კარუსელში გამართულ საერთაშორისო გამოფენებში ქართველი მხატვრების მონაწილეობა შეაჯამეს.
მთავრობოს ინფორმაციით, ზურაბ პატარაძემ ხელოვანებს ქართული კულტურის საერთაშორისო ასპარეზზე წარმოჩენისთვის მადლობა გადაუხადა. მისი განცხადებით, აჭარის მთავრობა გააგრძელებს კულტურის სამინისტროს ინიციატივების მხარდაჭერას, რომლებიც ეროვნული იდენტობის განმტკიცებას, კულტურული დიპლომატიის გაღრმავებასა და კულტურული ტურიზმის განვითარებას ემსახურება.
შეხვედრაზე ყურადღება გამახვილდა გონიოს ფესტივალზე, პეტრას ციხის ისტორიის გაცოცხლებასა და „შავი ზღვის მუსიკისა და ხელოვნების საერთაშორისო ფესტივალზე“, რომელიც იუნესკოს პატრონაჟით იმართება. მთავრობის თავმჯდომარემ აღნიშნა, რომ მაღალი დონის კულტურული ღონისძიებები რეგიონის ცნობადობას ზრდის და მას ვიზიტორებისთვის კიდევ უფრო მიმზიდველს ხდის.
ზურაბ პატარაძემ ბათუმის ნიკოლოზ კანდელაკის სახელობის სამხატვრო სკოლას დაარსებიდან 90 წლის იუბილე მიულოცა და ხაზი გაუსვა მის როლს სახვითი ხელოვნების განვითარებასა და ახალგაზრდა თაობის შემოქმედებითი პოტენციალის წარმოჩენაში.
შეხვედრაზე აჭარის კულტურის მინისტრმა ელისო ბოლქვაძემ მთავრობის თავმჯდომარეს სამინისტროს ინიციატივებისა და პროექტების განხორციელებისას გაწეული მნიშვნელოვანი მხარდაჭერისთვის მადლობა გადაუხადა. მან ხაზი გაუსვა თითოეული ხელოვანის წვლილს ქართული კულტურის დაცვაში, განვითარებასა და პოპულარიზაციაში. თავის მხრივ, ხელოვანებმა აღნიშნეს, რომ სამინისტროს ინიციატივები ხელს უწყობს მათ პროფესიულ ზრდას, ეკონომიკური შესაძლებლობების შექმნასა და შემოქმედებითი საქმიანობის გააქტიურებას.
მთავრობის თავმჯდომარემ მუსიკალური ცენტრის მუზეუმიც დაათვალიერა, სადაც მოწყობილი ეთნოგრაფიული კუთხეები აჭარის ტრადიციულ ყოფას, კულტურულ მემკვიდრეობასა და მრავალფეროვნებას წარმოაჩენს.
შეხვედრას აჭარის მთავრობის ადმინისტრაციისა და კულტურის სამინისტროს წარმომადგენლები, კულტურის დაწესებულებებისა და შემოქმედებითი კოლექტივების ხელმძღვანელები, მუსიკოსები და მხატვრები ესწრებოდნენ.