შალვა პაპუაშვილი: მოღალატეებს საქართველოს ისტორიაში ყოველთვის სათანადო ადგილი აქვთ მიჩენილი

ხიდაშელისა და ზურაბიშვილის მაგალითზე ყველამ უნდა ისწავლოს, როგორ ექცევიან აგენტებს. ჩაიყვანენ და ასეთ ღალატს ჩაადენინებენ, ეს არის ყველა აგენტის ხვედრი, – ამის შესახებ საქართველოს პარლამენტის თავმჯდომარე შალვა პაპუაშვილმა ჰელსინკის კომისიაში გამართულ მოსმენასთან დაკავშირებით განაცხადა. როგორც პაპუაშვილმა აღნიშნა, მოღალატეებს საქართველოს ისტორიაში ყოველთვის სათანადო ადგილი აქვთ მიჩენილი.

„ზოგადად, რამდენიმე საკითხი იყო. ამ სხდომაზე კელი დეგნანის დანახვით, მგონი, ყველაფერი ნათელი გახდა. ერთადერთი, ვინც უნდა დაეკითხა ამ კომისიას, თუკი მართლა აინტერესებთ რაღაც პროცესების ახსნა, იყო ქალბატონი კელი დეგნანი. ის უნდა დაეკითხათ 2020 წლის PVT-ის გაყალბების საკითხზე. ჩვენ დღეს დადასტურებით ვიცით, რომ „ისფედმა“ გააყალბა PVT-ი. დადასტურებით ვიცით, რომ USAID-მა იცოდა, PVT იყო ყალბი რიცხვები და დიდი ალბათობით, 99%-ის გარანტიით შეგვიძლია ვთქვათ, რომ მაშინდელმა ელჩმა კელი დეგნანმა იცოდა, რომ იყო ყალბი რიცხვები. USAID-ი ზის საელჩოში, არის სახელმწიფო სტრუქტურა და შეუძლებელია, მას დაემალა ელჩისთვის. თუ არადა, მაშინ ისიც უნდა თქვას, დამიმალესო. შესაბამისად, 2020 წელს „ისფედის“, „ენჯეოების“ ჩართვით, USAID-ის დაფინანსებით იგეგმებოდა ხელისუფლების დამხობა ძალადობრივი გზით და ამაში მონაწილეობდა ბევრი ადამიანი. დღეს ტრამპმაც ამხილა ეს ყველაფერი. მეორე, ჩვენ რაც ვიხილეთ, ვიხილეთ ანტიტრამპისტები, მათ შორის, ადამიანები, რომლებიც სალომე ზურაბიშვილის სახით ამბობდნენ, რომ ტრამპმა რუსეთის ჩარევით გაიმარჯვა და ა.შ. იქ მჯდომი ხალხი, მათ შორის. ეს ერთი ნაწილი და მადლობა ჰელსინკის კომისიას, რომ ასე ერთად ვნახეთ „დიფ სთეითის“ აგენტები. რაც შეეხება ამ ორ ქალბატონს, რომლებიც იქ ისხდნენ და საქართველოს წინააღმდეგ აძლევდნენ ჩვენებას, მოღალატეებს საქართველოს ისტორიაში ყოველთვის სათანადო ადგილი მიეჩინებათ. ეს ორი მოღალატე საქართველოს წინააღმდეგ ჩვენებას იძლევა. ზურაბიშვილის შემთხვევაში – არა, მაგრამ ხიდაშელის შემთხვევაში ხომ არის, რომ ჩვენებას იძლევა იმ ქვეყნის წინააღმდეგ, რომელმაც ის შობა და აღზარდა. ეს ორი მოღალატე თავის კუთვნილ ადგილს მიიღებს საქართველოს ისტორიაში. თქვენ წარმოიდგინეთ, ამერიკის ექსპრეზიდენტი რომ ჩამოვიდეს და საქართველოს პარლამენტის საგამოძიებო კომისიაში მისცეს ჩვენება ამერიკის წინააღმდეგ. სინამდვილეში, ეს არის ყველა აგენტის ხვედრი და ყველამ უნდა ისწავლოს ხიდაშელის და ზურაბიშვილის მაგალითზე, როგორ ექცევიან აგენტებს. ჩაიყვანენ და ასეთ ღალატს ჩაადენინებენ. ეს არის ყველა აგენტის ხვედრი“, – განაცხადა შალვა პაპუაშვილმა.

ცნობისთვის: ჰელსინკის კომისიაში გუშინ გაიმართა მოსმენა სახელწოდებით „პარტნიორიდან პრობლემამდე: საქართველოს ანტიამერიკული გადახვევა“. ჰელსინკის კომისიის სხდომაზე მოწმის სტატუსით წარდგნენ საქართველოს ყოფილი პრეზიდენტი სალომე ზურაბიშვილი, საქართველოს თავდაცვის ყოფილი მინისტრი თინათინ ხიდაშელი, ჰადსონის ინსტიტუტის ევროპისა და ევრაზიის ცენტრის უფროსი მკვლევარი ლუკ კოფი. მოსმენას დარბაზში ესწრებოდა საქართველოში აშშ-ის ყოფილი ელჩი კელი დეგნანი. დემოკრატმა კონგრესმენმა ჰელსინკის კომისიაში განაცხადა, რომ „სამწუხაროდ, სენატმა არ მიიღო და არ მიიღებენ „მეგობარ აქტს“.