ბერლინის მკაფიო სიგნალი და თბილისიდან პასუხი – გერმანიის ელჩის გარშემო განვითარებული მოვლენები

ბერლინში საქართველოს ელჩის გაწვევასთან დაკავშირებული დიპლომატიური ნაბიჯები კვლავ საჯარო განხილვის თემაა. გერმანიის საგარეო საქმეთა სამინისტროს პრესსპიკერმა გერმანულ მედიასთან კომენტარში აღნიშნა, რომ პეტერ ფიშერის კონსულტაციებისთვის გამოძახება „ძალიან მკაფიო დიპლომატიურ სიგნალს“ წარმოადგენდა საქართველოს ლიდერებისთვის.

უწყებაში აცხადებენ, რომ ბერლინს საქართველოს მთავრობისგან მკაფიო მოლოდინი აქვს,  აღარ განმეორდეს ელჩის მიმართ პირადი თავდასხმების მსგავსი ტონი. პრესსპიკერის თქმით, გერმანიის საგარეო უწყებამ ამ საკითხზე საქართველოს ხელისუფლებასთანაც გამართა საუბარი.
„ახლა საქართველოს ხელმძღვანელობას მისი ქმედებებით ვაფასებთ. შემდგომ დასკვნებს აქედან გამოვიტანთ,“ – აღნიშნეს სამინისტროში.

თემას გაგრძელება მოჰყვა თბილისში. საპარლამენტო უმრავლესობის წევრმა თენგიზ შარმანაშვილმა  განაცხადა, რომ საქართველოს მხრიდან ელჩზე თავდასხმა არ ყოფილა და საუბარი შეეხებოდა მხოლოდ ვენის კონვენციის შესაძლო დარღვევას.   მისივე განმარტებით, ელჩის ქცევებზე მითითება საფუძვლიანი იყო და არა პოლიტიკურად მოტივირებული.
„ელჩი ინტერესთა კონფლიქტში არ უნდა შევიდეს პოლიტიკურ ორგანიზაციასთან… ჩვენ მას საფუძვლიან მითითებას ვაძლევდით. ჩვენი ქცევა მის ქცევაზე იქნება დამოკიდებული. თუ ნორმალურ რეჟიმს დაუბრუნდება, ამას ჩვენი მხრიდან ხელშეწყობა ექნება,“ – აღნიშნა შარმანაშვილმა.

დაბრუნების შემდეგ, პეტერ ფიშერმა სოციალურ ქსელში მოკლე განცხადებაც გამოაქვეყნა. ელჩის თქმით, მისთვის სასიამოვნოა თბილისში დაბრუნება და მადლიერია იმ ადამიანების, რომლებმაც ქვეყანაში სოლიდარობითა და მადლიერებით  მიიღეს.
„შემოდგომაზე ბერლინი – ეს განწყობაა, თუმცა სასიამოვნოა თბილისში დაბრუნება… დიდ მადლიერებას ვუცხადებ საქართველოს ბევრ კეთილ ადამიანს და მეგობარს,“ – წერს ფიშერი.

გერმანიის საგარეო საქმეთა სამინისტრომ ელჩის გაწვევის გადაწყვეტილება 19 ოქტომბერს გაავრცელა. კონსულტაციები ბერლინში რამდენიმე კვირა გაგრძელდა. 6 ნოემბერს კი გერმანიის საგარეო საქმეთა სამინისტრომ ოფიციალურად განაცხადა, რომ პეტერ ფიშერი საქართველოში დაბრუნდა.